Прамыя авіязносіны паміж Мінскам і Ашгабадам спыніліся ўвесну 2020 года ў сувязі з абмежаваннямі, уведзенымі праз пандэмію COVID-19.
Пытанне аднаўлення авіязносін паміж Мінскам і Ашгабадам абмеркаваў з намеснікам прэм’ер-міністра Туркменістану Батырам Аннаевым 8 кастрычніка ў туркменскай сталіцы міністр замежных спраў Беларусі Максім Рыжанкоў.
Адзначаецца, што бакі таксама «абмеркавалі магчымасці выкарыстання беларускім бокам транспартна-лагістычных калідораў Поўнач — Поўдзень і Захад — Усход, якія праходзяць праз тэрыторыю Туркменістану, а таксама партовай інфраструктуры для выбудоўвання ў Каспійскім рэгіёне ланцужкоў дастаўкі айчынных тавараў».
Туркменскі бок, як заяўлена, выказаў зацікаўленасць у «далейшым развіцці супрацы ў галіне адукацыі ў частцы падрыхтоўкі высокакваліфікаваных кадраў па запатрабаваных у краіне спецыяльнасцях».
8 кастрычніка Аляксандр Лукашэнка накіраваўся ў Туркменістан на саміт Садружнасці Незалежных Дзяржаў. Яго прэс-служба анансавала сустрэчу з прэзідэнтам Расіі Уладзімірам Пуціным у рамках гэтага мерапрыемства.
Крыніца: Позірк. Навіны пра Беларусь/юл